الشعراوي لما سألوه رأيك ايه في المثل اللي بيقول "اخطب لبنتك وماتخطبش لابنك "
كان رده جميل أوي
بدأ كلامه بآية في القرأن بتقول ، بعد أعوذ بالله من الشيطان الرجيم " إني أريدُ أن أُنكِحَكَ إحدى ابنتي هاتين"
ده مين اللي بيقول كده أبو البنتين اللي شافهم سيدنا موسى عند البئر مش عارفين يسقوا الأغنام بتاعهم
وبيكلم مين سيدنا موسى عليه السلام
يعني اللي طلب كده أبو البنت مش سيدنا موسى
طيب الموضوع ده ليه شروط ولا اي حد يشوف اي شاب يروح يخطبه لبنته؟
لأ طبعا لازم أبو البنت يختار شاب كويس مش اي شاب وده هنلاقيه في الآية اللي قبلها اللي بتقول " يأبت استئجره لنا
إن خير من استأجرت القوي الأمين" صدق الله العظيم
وخلي بالك ان اللي قال الآية دي البنت مش أبوها وده يأكد ان البنت لازم تكون هي راضية بالشاب
ماهو ممكن يكون شاب كويس بس البنت مش موافقة عليه
حاجة كمان لما ابو البنت قرر يخطب سيدنا موسى لبنته ما فرضش عليه واحدة منهم وقاله اتجوز دي
ده قاله " إحدى هاتين" يعني ترك الاختيار لسيدنا موسى
عشان كده نتعلم من القرأن بتاعنا اسلوب حياتنا
الأب اللي يشوف شاب كويس لبنته ما يترددش انه يعرضه على بنته الاول وبعدين يروح يكلم الشاب
مافيهاش زعل لو الشاب رفض ومافيهاش قلة كرامة ان ابو البنت هو اللي يبدأ
بس لازم يكون أبو البنت عنده المقومات اللي بيها الشاب يوافق على بنته قبل ما يفاتحه في الموضوع.